De Historie van K.V. de Sjravelerre Mhèèr
Ut oprichtingsjaor van van K.V. de Sjravelerre is 1952.
In ut naojaor van dat jaor keeme u paar mansluuj oet ut dörrep op ut idee um ing karnevalsvereniging op te richte um zoe te zörrege dat mit de Vastenaovend 1953 der uursjte Preens Karneval vaà Mhèèr oetgerope koes were.
Mèh der woert oich al vööl ierder Karneval geveert I Mhèèr. Der zunt verhaole bekint oet der nuggetieënde ieuw dat toen al op ing bepaolde meneer Karneval veer I Mhèèr besjtong.
Verkleijd es mom trokke de luuj op der meziek van inne kwetsjbuul van döör tot döör um dao oonder ut genot van u dröpke u denske te make.
Mèh truuk nao 1952: Zoe wie gezaag keeme toen u aantal jong mansluuj van ut Joonkhèèd biejèèn um te komme tot ing echte karnevalsverniging.
Der woert geprakkezeert en geprakkezeert en oeteindelik keeme ze op 27 jannewari 1953 wer in biejèèn um de ideeje die ze de monde daoveur verzamelt hawwe ten oetveur te bringe.
In dis vergadering, die oonder veurzittersjap sjtong van Jules Notermans, woert Piet van Gerven tot Vorst gekooze, Hay Hermans woert sekretaris en Jaques Quanten penningmèèster.
Wiejer woert op dis vergadering de doelsjtilling van de vereniging vasgesjtilt, inge Road van Illuf gekooze en de uursjte Preens karneval vá Mhèèr.
De aander raodsleede waore: Sjef Willems, Huub Weusten, Wiel Didden, Jos Notermans, René Hendrikx, Jan Dobbelstein, Hub Beugels en Alfons van Gerven.
Sjef Willems mit illuf van de twelf sjtumme verkooze tot de uursjte Preens karneval vá Mhèèr.
Op zotterdig 7 fibberwari 1953 woert Sjef Willems, op de alleruursjte zitting oetgeroope tot Preens Karneval vá Mhèèr en koes hee zich goe opmake um oonder der naam Preens Jolandea Belanda driej daag Mhèèr veur te goe in de Vastenaovend.
Op die uursjte zitting woert och der naam van de vereniging bekind gemak:
De Sjravelerre.
Mhèèrdenerre woerte in dèè tied diks Sjravelerre geneumt, umdat der I Mhèèr altijd wal inne berg waor, mit name der Hoesberrig, um op of aaf te sjravele.
Och woert in 1953 der uursjte karnevalssjlager vá Mhèèr gesjreeve deur mèèster Mans op de melodie van Ëdelweiss”.
Och woert der uurste optoch gehaowe en hieveur woerte alle vereniginge vá Mhèèr aangesjreve um mit te doe.
Wie me an dizze optoch mit wool doe dat moegte ze zelf noa èège inzich bedeenke.
Ing veurwaarde waor waal: In dizze optoch zow mer èène waagel mittrikke en dat waor der preensewaagel.
In de jaore dao nao woert ut gebööre roontelum de Karneval nog wiejer oetgebreid:
Der keeme zittinge, boonte aovende en in 1959 woert ing jeugafdeling opgerich.