Op zotterdigaovend 16 jannewarie is nao ing hiel fieng Groete Zitting beneump en aangesjtild es Preenses Karneval va Mhèèr: Preenses Trudy de Uursjte ! Trudy hèèsj dur ut jaor Trudy Weusten - van Proemeren en is getrowd mit Wiliam Weusten. Heure pap, d'r Frans van Proemeren, is d'r Iere-Vorst van de Sjravelerre. De Trudy is jaorelaank daansmarieke gewes i Mhèèr, hat mitgesjpuld in d'r Dörpskroniek, de Keenderzitting mit georganiseerd en hat same mit heur zuster Corien en d'r Jos Senden gezonge in d'r Karnevalsgroep 'Dè Da !'. Preenses Trudy is dus gène oonbekinde in Karnevalverend Mhèèr en d'r wieje umsjtreeëk en dus zal dat mit de Vastenaovend in Mhèèr gaans good komme. 

Vurdat Preenses Trudy I dur de Oad-Preense Garde nao veure gebraach is wore, hat eederèèn kinne genete van ing geweldige Karnevalszitting mit Chrit Driessen in de buut, Zaank van Frans Crooneberg, daans van Daansgroep Jump en èè wervelend daanssjpektakel van d'r Daansgroep van de Waggelerre va Voere. Ing sjpeciale èkt van d'r Jean Dobbelstein en d'r Mikel Gubbels braach d'r gaanse zaal in verveuring mit hun gewaagde 'haanddook-optrèèje' Tensjlotte wor d'r Dörpskroniek wer van owwerwitsje klasse mit humor, skètches, zaank en veuraal unne hòòp kolder uvver situaasies die zich aafgeloape jaor hubbe aafgesjpuld in Mhèèr.

Ut aaftrèèje van Preens Matthijs I kroog nog ing extra dimensie durdat de Bergweider Muzikaante same mit d'r Nico Senden ut leedsje 'D'r joonkgezel' ten gehure braachte. Dat leedsje is gesjreëve dur d'r Bert Senden op d'r aovend van ut oetrope van Preens Matthijs verlèèje jaor. D'r Bert hat zich doe drek an ut sjrieve gezat. Preens Matthijs hat daoneëve vur nóg èè fie gebaar gezurgd dur zie Preense-pak ter besjikking te sjtille an de Karnevalsvereniging, mè ut moag alling mer gedraage were dur unne vriegezel !

De Aod-Preense Garde hat wie gezaach de nuuj Preenses nao de buhne op begeleid. Vorst Jos how vur dis gelegenhèèd de hulp ingerope van d'r jubilerende Ier-Vorst Frans (3 x 11 jaor lid) um d'r dook ope te trikke oe de Preenses vervolgens oetsjprong. Ozze Iere-Vorst wor neet op de huugte van ut fèèt dat zieng dochter Preenses woerd en dat zurgde d'r veur dat d'r Frans meujte how um de oage druug te hoate. 

Aal mit aal kin veer truukkieke op ing hiel gesjlaagde Groete Zitting 2016 mit ing nuuj Preenses: Trudy de Uursjte. Alaaf !

Op zoondig 22 november hubbe Preens Matthijs mit JeugPreens Damien, vergezeld van hunne wieze Raod van Illuf, èè bezeuk gebraach an d'r Karnevalsmatinee van de Harmeniej. Dao woerd os è prachtig programma veurgesjotteld mit meziek, kolder en flauwe köl. Op de foto kint deer zie dat Preens Matthijs neet alling es gas aanwezig wor mè hee sjtong och nog op de buhne es ballitdaanseres. En dat ging um good aaf. Och Vorst Jos verrasde d'r zaal mit zieng èct es kloon Popov en mit ing oetveuring van Circus Renz op Xylofoon. Oad-Preens Robert Dautzenberg sjitterde es kandidaat - dirigent bie 'Maestro' oe och d'r Armand Opreij an mitdoog en Oad-Preens Jack de Roo begeleidde d'r Willy Huppertz mit ziene solo van Der Alte Dessauer. Kartoesj en d'r Frans Crooneberg makde d'r middig kompleet.