Och dit jaor zal veer ut Vastenaovessezoen sjtarte mit ut vere van Oad op Nuuj op zotterdig 10 november. Op dizzenaovend zalle os twie jubilarisse gehuldigd were (Jos Senden 3x11 en Piet Beckers 2x11) en Preens Marc en Preenses Silvie zalle same mit Jeugpreenses Lotte hun Preensefoto's in de Preensegalleriej plaatsje.
Daonao zal ut loos goe mit oonder aandere Don Kiesjot en Christian & Jos. Um exact 12 gunt de mutsje op en is ut nuuj Karnevalssezoen è feit.
Entree is gratis dus komt mer ins lore en uch ammezere.
De Sjravelerre Gezit 2018 is oet ! Sjpesjiaal vur ut Jubileum is veur- en aachterkaant in kleur. D'r kint ze hie och onlajn leëze.
Mit Oad-op-Nuuj zunt veer begonne mit ozze Route 66 richting ut Jubileum, en nao versjillende sjtaassies zit veer noe op oonderhof weëk vur de Karneval en ut gèèt ummer vlotter. Die Route 66 begint sjtillekes op ing achbaan te lieke. Van vrolluujzitting, jeugzitting, Jubileumzitting en verlèèje zoondig nog de MPS zitting vlege veer in vol vaart op de Karneval aa. Daoneeëve bezeuke veer och nog aander Karnevalsevenemèènte zoewie de Zittinge i Voere, Teuve, Semeerte en versjillende russepsies. Os Preensepaar Marc I en Silvie I hubbe ut mer druk. Verlèèje zotterdig hubbe ze è radio-intervjoew gehad bie RTV Maas & Mergelland en daonao och nog è tillevies-intervjoew. Dat kint deer pus an de Karneval zie langskomme bie TRV Maas & Mergelland (of klik op dizze link: Oetrope Preensepaar va Mhèèr op RTV Maas & Mergelland ). Tussje deur hub veer och nog d'r Roondgaank gehaote oebie veer alle luuj va Mhèèr noch hiel hartelik wille bedaanke vur hun biedrage. Noe Donderdig bringe de Sjravelerre è bezeuk an ut Internasjonaal Preensetreffe i Groonsvèèld en vriedig zunt veer te gas bie de zitting van BMR. Kommende zotterdig gèèt os Preensepaar foto's lote make mit alle Preense oet ut Heuvellaand vur in de gezit, dat geböört i Mestreech in ut Centre Céramique. Daonao were ze wer op ut gemeentehoes verwaach vur ing foto mit alle Preense van de gemeente Èèsde-Merregraote. Sjnooënes gunt veer nog langs bie de zitting van Talent in Ikkelder en saoves gunt veer op Tebannet aa vur de russepsie dao. Zoondig wurd de Boetezitting in Èèsde bezoch en kommende mondig de Bejaardezitting in Segietere. Dus de Route 66 is ram volgeplend wie dr zeet.
Zotterdig 20 jannewarie is in unne bomvolle Harmeniejzaal i Mhèèr oetgerope es Preens Karneval 2018 van de Sjravelerre va Mhèèr: Preens Marc I en Preenses Silvie I (Marc Gubbels en Silvie Senden). Zie zunt dit jaor neet alling ut JubileumPreensepaar van de 6x11-jäörige Sjravelerre, mè zie zalle och es GemeentePreensepaar op Karnevalszotterdig d'r Sjlöttel van de gemeente in ontvangs neme en driej daag uvver de gaanse gemeente Èèsde-Merregraote regere.
De Jubileumzitting wor alwer van oetzeunderlik hoege kwalitèèt mit Daansgroep Jump es eupeningsnummer en daonao in de buut Jan Heffels es JeugPreens. Ut daanspaar Saskia en Levi oet Viele oogste och enorm vööl applaus mit hun acrobatische toere die ze os hubbe lotte zie. De miervoudig Belsj én Europees Kampioene hubbe lotte zie dat ze dat neet zoemer gewore zunt. In Mei gunt zie nao Oosterriek vur hun illufde Europees Kampioensjap. De Oad-Preense hubbe daonao ing prachtige sjow opgeveurd es Kozakke-koer mit unne hiele bezeundere dirigèènt in de gedaante van Donald Trump, èè geweldig optrèèje van os Oad-Preense wat dur ut publiek och mit vööl applaus gewardeerd is wore. Dan wor ut de böört an ut bekinde zangduo Bjorn en Mieke. Mit hun nummer 'Doezend Sterre' hubbe zie verlèèje jaor op ut LVK de twiede plaatsj behold achter de Geliënde en op os Jubileumzitting hubbe zie de tèènt behuurlik op d'r kop gezat.
Lees meer: Preens Marc I en Preenses Silvie I
Mit ut leedsje "Doezend Sjterre" woerte Bjorn en Mieke verlèèje jaor twiede op ut LVK achter de Geliënde oet Hulsberg. De Geliënde zunt op os Oad-op-Nuuj al te gas gewes bie de Sjravelerre en noe op os Jubileumzitting kin veer os opmake vur èè geweldig optrèèje van Bjorn & Mieke. Och dit jaor zunt zie wer van de partiej op ut LVK mit hun nuuj nummer "Droeëme mit de oeëge oop" en dao weunsj veer hun hiel vööl suukses bie !
Bjorn en Mieke zunt aafkomstig oet ut Venrayse laand en zalle os hie in ut uuterste zuide van os previnsie lotte genete van hun prachtige leedsjes op de Jubileumzitting van de Sjravelerre.
De Groete Zitting van dit jaor zal ing bezeunder zitting were. Neet alling roop veer op dis zitting ozze Jubileum-Preens oet mè dèè Preens zal och tegeliekertied Gemeente-Preens van de Gemeente Èèsde-Merregraote were. Dat betèkent dat ozze Preens op Karnevalszotterdig d’r Sjlöttel van de gemeente in ontvangs maog neme op ‘t gemeentehoes i Merregraote.
Veuraafgoand an dat oetrope van d’r nuuje Preens zal uursj nog è gaans program uvver de buuhn goe. Vanaaf 11 op aach pus dat ut gedoe is, hoef zich gène te vervèèle op dis zitting.
Jan Heffels (foto leenks) zal dizzenaovend in de Oranjerie in Remung d'r sjpits aafbiete op de Limburgse Buuttekampioensjappe mit de buut wat è och in Mhèèr op de Jubileumzitting gèèt bringe.
In de Sjravelerre-Gezit hub deer kinne leëze dat in de buut Jan Geraedts (foto rèèchs) zow optrèèje mè d'r Jan liek op ut memèènt in ut ziekehoes en d'r dokter hat um geadvizeerd um vurlööpig neet op te trèèje. Zoe kump ut dat d'r ène Jan d'r aandere zal vervange op os zitting. D'r ène Jan weunsj veer hiel vööl suukses in de Oranjerie en d'r aandere Jan weunsj veel hiel vööl sjterkte !!
Eedere deelnummer an d'r Groete Optoch van de Sjravelerre va Mhèèr op Karnevalsmondig is verplich um zich in te sjrieve. Dat kint op Karnealszotterdig vanaaf aach oore saoves in Café Quaante dur ut insjriefformeleer in de Sjravelerre dao in te lievere bie Vorst Jos en d'r Notaris. Es deer mit wilt doe an d'r optoch mot deer op de huugte zie van ut Optochrèèglemèènt. Es deer dat neet mie gaans oet d'r kop kint, klik dan op de foto van Preenses Trudy I hie-booëve en da kump ut optochrèèglemèènt nao veure.
| Preens Marc I & Preenses Silvie I |
Ieërevorst: Frans van Proemeren | |
| Raod van Illuf: | Lede: | |
| Vorst & Veurzitter: Jos Senden | Marleen Snoeck | |
| Sekretaris: Fons Bastings | Trudy Weusten | |
| Penningmèèster: Saskia van Dijk | Stan Goessens | |
| Piet Beckers | Iere-lid: | |
| Maurice Beckers | Peter van Hasselt | |
| Tom Caelen | ||
| Mark Gubbels | ||
| Roy van Gerven | ||
| Jack van Laar | ||
| Patrick Quanten | ||
| Jeroen Retrae | ||
| Matthijs Spauwen | ||
| Jos Stikkelbroek | ||
| Mark Soudant | ||
| Luc Vandewall | ||
| René Willems | ||
| Robby Wouters |
