Klik op ut logo um d'r nuuje sjlager: "D'r Hoesbèèrg" te downloade.
De Sjravelerre Gezit 2019 is oet ! Deer kint ze hie onlajn leëze.
Ut Karnevalssezoen sjtèèt alwer vur de döör en op zotterdig 10 november zal veer wer mit os Oad op Nuuj d'r aaftrap geëve vur ut nuuj sezoen. Dat gebeurt in Kaffie Quaante tengenuvver de keerik mit oonder aandere Don Kiesjot en Christian & Jos.
Mè get wier in d'r mond november sjtèèt os Groet Jubileumfiës op ut program. Op zoondig 25 november zal ut jubileumjaor van de Sjravelerre nao ut aafligke van de gaanse Route 66 ut jubileum aafsjlete mit è fantasties Jubileumfiës. Veer wille ging sjtief russepsie houwe want ut mot veuraal unne hiele gezellige Karnevalsmiddig were. Dèè wat wilt komme felicitere kriet dao och de gelegenhèèd veur mè veer gunt neet achter ing russepsietoffel sjtoe of zoeget. Och vur de Karnevalsvereniging mot ut unne gezellige middig zie. En vur die gezellighèèd hub veer un dèèl artieste oetgenuuëdigd die zekker wèète garaant sjtunt vur unne daverende Karnevalsmiddig. Wat daach deer van Kartoesj, Marleen Rutten, Sjpik & Sjpan, Christian & Jos en Limbo Express ! Dèè middig kint al neet mie kapot mit zoe èè affiche.
Oad op Nuuj hub veer achter dr ruk, dus dat betèkent dat ut Karnevalssezoen van sjtart is gegange. Dat hub veer gedoe mit Don Kiesjot en mit ut duo Christian & Jos die d'r vur gezurgd hubbe dat ut unne hiele sjieke aovend woert. Ut wor gezellig druk in Cafë Quanten en de luuj die dao worre hubbe zich good geammezeerd. Veer kinne wal zigke dat Mhèèr klaor is vur ut nuuj sezoen. En dat is och nuuëdig want zoondig 25 november sjtèèt alwer ut volgende evenemèènt op d'r agenda: Ut Groet Jubileumfiës van de Sjravelerre. Es aafsjleting van d'r Route 66 wurd um dèè zoondig ène gojje biegereëte en och dan wer mit topartieste, mè veuraal mit hiel vööl Vastenaovesplezeer.
De Vastenaovend 2018 wor um dur èè ringske te hole. Vanaaf d'r vriedigaovend mit de Ow Wieverbal, via d'r Sjlutteluvverdraach op ut gemeentehoes, opgeve vur d'r optoch, keendermiddig, Groete Optoch pus an ut aafsjlete van de Karneval op densdigaovend hub veer same mit os Preensepaar Marc & Silvie en os Jeugpreenses Lotte genooëte van al die fieng memèènte die op die daag vurbie zunt gekomme. Veer kinne truukkieke op ing JubileumKarneval die os nog wal è tiedsje zal bieblieve. De keersj op d'r kook wor natuurlik op densdigaovend ut optrèèje van Beppie Kraft, bove op d'r bieljart bij Jeanette. Wat wor dat sjiek ! Wie Beppie 'De Naach is nog zoe laank' aazat, zoogse unne gaanse bomvolle kaffie van leenks nao rèèchs bewege. Geweldig ! En Beppie zelf von ut och prachtig um te zie dat in os dörp zoe lèèft. "Bovenop deej biljart is diks leuker es veur unne volle zaol mit doezende luj", zaag ut. De Karneval is dan wal um, mè in november geve veer alwer opnuuj gaas mit uursj Oad op Nuuj op 10 november en daonao op zoondig 25 november os Groet Jubileumfieës.
Och dit jaor zal veer ut Vastenaovessezoen sjtarte mit ut vere van Oad op Nuuj op zotterdig 10 november. Op dizzenaovend zalle os twie jubilarisse gehuldigd were (Jos Senden 3x11 en Piet Beckers 2x11) en Preens Marc en Preenses Silvie zalle same mit Jeugpreenses Lotte hun Preensefoto's in de Preensegalleriej plaatsje.
Daonao zal ut loos goe mit oonder aandere Don Kiesjot en Christian & Jos. Um exact 12 gunt de mutsje op en is ut nuuj Karnevalssezoen è feit.
Entree is gratis dus komt mer ins lore en uch ammezere.
Mit Oad-op-Nuuj zunt veer begonne mit ozze Route 66 richting ut Jubileum, en nao versjillende sjtaassies zit veer noe op oonderhof weëk vur de Karneval en ut gèèt ummer vlotter. Die Route 66 begint sjtillekes op ing achbaan te lieke. Van vrolluujzitting, jeugzitting, Jubileumzitting en verlèèje zoondig nog de MPS zitting vlege veer in vol vaart op de Karneval aa. Daoneeëve bezeuke veer och nog aander Karnevalsevenemèènte zoewie de Zittinge i Voere, Teuve, Semeerte en versjillende russepsies. Os Preensepaar Marc I en Silvie I hubbe ut mer druk. Verlèèje zotterdig hubbe ze è radio-intervjoew gehad bie RTV Maas & Mergelland en daonao och nog è tillevies-intervjoew. Dat kint deer pus an de Karneval zie langskomme bie TRV Maas & Mergelland (of klik op dizze link: Oetrope Preensepaar va Mhèèr op RTV Maas & Mergelland ). Tussje deur hub veer och nog d'r Roondgaank gehaote oebie veer alle luuj va Mhèèr noch hiel hartelik wille bedaanke vur hun biedrage. Noe Donderdig bringe de Sjravelerre è bezeuk an ut Internasjonaal Preensetreffe i Groonsvèèld en vriedig zunt veer te gas bie de zitting van BMR. Kommende zotterdig gèèt os Preensepaar foto's lote make mit alle Preense oet ut Heuvellaand vur in de gezit, dat geböört i Mestreech in ut Centre Céramique. Daonao were ze wer op ut gemeentehoes verwaach vur ing foto mit alle Preense van de gemeente Èèsde-Merregraote. Sjnooënes gunt veer nog langs bie de zitting van Talent in Ikkelder en saoves gunt veer op Tebannet aa vur de russepsie dao. Zoondig wurd de Boetezitting in Èèsde bezoch en kommende mondig de Bejaardezitting in Segietere. Dus de Route 66 is ram volgeplend wie dr zeet.
Eedere deelnummer an d'r Groete Optoch van de Sjravelerre va Mhèèr op Karnevalsmondig is verplich um zich in te sjrieve. Dat kint op Karnealszotterdig vanaaf aach oore saoves in Café Quaante dur ut insjriefformeleer in de Sjravelerre dao in te lievere bie Vorst Jos en d'r Notaris. Es deer mit wilt doe an d'r optoch mot deer op de huugte zie van ut Optochrèèglemèènt. Es deer dat neet mie gaans oet d'r kop kint, klik dan op de foto van Preenses Trudy I hie-booëve en da kump ut optochrèèglemèènt nao veure.
| Preens Marc I & Preenses Silvie I |
Ieërevorst: Frans van Proemeren | |
| Raod van Illuf: | Lede: | |
| Vorst & Veurzitter: Jos Senden | Marleen Snoeck | |
| Sekretaris: Fons Bastings | Trudy Weusten | |
| Penningmèèster: Saskia van Dijk | Stan Goessens | |
| Piet Beckers | Iere-lid: | |
| Maurice Beckers | Peter van Hasselt | |
| Tom Caelen | ||
| Mark Gubbels | ||
| Roy van Gerven | ||
| Jack van Laar | ||
| Patrick Quanten | ||
| Jeroen Retrae | ||
| Matthijs Spauwen | ||
| Jos Stikkelbroek | ||
| Mark Soudant | ||
| Luc Vandewall | ||
| René Willems | ||
| Robby Wouters |
