Oad op Nuuj

Och dit jaor zal veer ut Vastenaovessezoen sjtarte mit ut vere van Oad op Nuuj op zotterdig 10 november. Op dizzenaovend zalle os twie jubilarisse gehuldigd were (Jos Senden 3x11 en Piet Beckers 2x11) en Preens Marc en Preenses Silvie zalle same mit Jeugpreenses Lotte hun Preensefoto's in de Preensegalleriej plaatsje. 

Daonao zal ut loos goe mit oonder aandere Don Kiesjot en Christian & Jos.  Um exact 12 gunt de mutsje op en is ut nuuj Karnevalssezoen è feit.

Entree is gratis dus komt mer ins lore en uch ammezere.

Sjravelerre Gezit 2018

De Sjravelerre Gezit 2018 is oet ! Sjpesjiaal vur ut Jubileum is veur- en aachterkaant in kleur. D'r kint ze hie och onlajn leëze.

ALAAF !!!

A+ R A-

Preens Marc I en Preenses Silvie I

Zotterdig 20 jannewarie is in unne bomvolle Harmeniejzaal i Mhèèr oetgerope es Preens Karneval 2018 van de Sjravelerre va Mhèèr: Preens Marc I en Preenses Silvie I (Marc Gubbels en Silvie Senden). Zie zunt dit jaor neet alling ut JubileumPreensepaar van de 6x11-jäörige Sjravelerre, mè zie zalle och es GemeentePreensepaar op Karnevalszotterdig d'r Sjlöttel van de gemeente in ontvangs neme en driej daag uvver de gaanse gemeente Èèsde-Merregraote regere. 

De Jubileumzitting wor alwer van oetzeunderlik hoege kwalitèèt mit Daansgroep Jump es eupeningsnummer en daonao in de buut Jan Heffels es JeugPreens. Ut daanspaar Saskia en Levi oet Viele oogste och enorm vööl applaus mit hun acrobatische toere die ze os hubbe lotte zie. De miervoudig Belsj én Europees Kampioene hubbe lotte zie dat ze dat neet zoemer gewore zunt. In Mei gunt zie nao Oosterriek vur hun illufde Europees Kampioensjap. De Oad-Preense hubbe daonao ing prachtige sjow opgeveurd es Kozakke-koer mit unne hiele bezeundere dirigèènt in de gedaante van Donald Trump, èè geweldig optrèèje van os Oad-Preense wat dur ut publiek och mit vööl applaus gewardeerd is wore. Dan wor ut de böört an ut bekinde zangduo Bjorn en Mieke. Mit hun nummer 'Doezend Sterre' hubbe zie verlèèje jaor op ut LVK de twiede plaatsj behold achter de Geliënde en op os Jubileumzitting hubbe zie de tèènt behuurlik op d'r kop gezat. 

Ing van de hoegtepùùnte van de Groete Zitting van de Sjravelerre is altied d'r Dörpskroniek. Dit jaor howwe zie och jubileum want ut wor vur hun d'r 33e kier dat ze i Mhèèr op de buuhn sjtonge. Achteraaf zunt zie daoveur dan och gehuldigd. In ut bezeunder woerte de twie luuj die van ut uursjte oor al d'rbie worre, en noe nog ummer, in ut zunneke gezat: d'r Piet Beckersj es decorboewer en akteur mit d'r Jos Senden es bedeenker, tekssjriever, leedsjessjriever, akteur, zenger én regisseur. Mè d'r Dörpskroniek zelf dèè wor wer gaans gevuld mit kolder, zaank, meziek en veuraal vööl flauwe kööl uvver ut dörp mè och uvver actuele algemene oonderwerpe. Van hiel vööl luuj hub veer gehuurd dat dit ène van de bitste Kronieke wor van die 33 die veer noe gezie hubbe. Via tereurdreiging woerd ut publiek mitgesjlip nao de uvvervalle bie de Sjpar, de poliessie-actie in Oonder-Mhèèr, de Bom in d'r busj, de sjeetperikele van de sjutteriej, ut konkoer van de harmeniej, de ertesop mit de sjlipjach en och d'r recente doedgesjote hoond in Hoembusj.  Dit sjtukske mit allemaol mier of minder kriminele deenger woerd aafgesjlooëte mit è prachtig leedsje gezonge dur Emma Moonen. Daonao keem ing persiflage op ut Galabal van de sjutteriej kompleet mit piano en sopraan-zangeres. De #metoo discussie keem och nog langs en de litste scène woert gevuld mit un aantal sjilders oet ut dörp die ummer allerlei luuj langs zoge komme um te flaajere vur ut een of ut aander. Zie howwe dan ummer ut advies um die actevetèèt aaf te sjaffe en, mit unne knipoog nao de aafgelaope septemberkermis, unne brunch te organisere, mit daonao Sjeng en Sjir... en de Sjele. Es aafsjleting daovan woerd nog mer uns lotte zie wie noe èègelik d'r Bummel Petrus gedaanst mot were want mit de Broonk op de koere van de boerderieje dèèd eederèèn mer get. Es litste how d'r Jos Senden de emotionele mededeling dat dit d'r litste Dörpskroniek wor, mè dat d'r waal al un alternatief gevoonde is: unne brunch organisere mit daonao Sjeng en Sjir ... en de Sjele. En wat gebeurde doe: Sjeng, Sjir .... en de Sjele keme zelf vanoet d'r zaal al sjpeulend de buuhn op en sjpulde dao oonder aandere hun prachtig leedsje 'Dörpsfigure'. Daonao woert mit è lekker samba-achtig nummerke dizze 33e Kroniek aafgesjlooëte. 

Ut Preensepaar van verlèèje jaor Preens Luc I en Preenses Saskia I hubbe daonao aafsjeid genomme es Preensepaar nao è geweldig Preensejaor. Och es Karnevalsvereniging hub veer genote van dit Preensepaar wat de Sjravelerre mè och ut gaanse dörp ummer op ing hiel goj meneer vertegenwoordigd hat. Luc en Saskia: BEDAANK DAOVEUR !!!

Nao de pauze wor ut dan tied um d'r nuuje Preens oet te rope. Gaans in sjtijl van de Route 66 keme de Oad-Preense mit unne traajk de buuhn op, besjtuurd dur Jeugpreenses Lotte. In dèè traajk zot dan ut nuuj Preensepaar en wie die oetkeme gesjpronge koesse an d'r zaal huure dat dat wal good kump dit jaor: Preens Marc I en Preenses Silvie I !!  

D'r Marc is incident-manager bie KPN en Silvie hult zich bezig mit keenderopvang. D'r Marc is bezeunder druk in ziene vrieje tied: Besjtuurslid en geweerdrèèger bie de sjutteriej, druk doonde bie de voetbalclub, sjlipjachkommetee, akteur bie d'r Dörpskroniek, lid van d'r Raod van illuf en die hoedanighèèd oonder aandere belas mit ut vasligke van artieste en nog vööl mieje. Silvie is vreuger ummer daansmarieke gewes bie de Sjravelerre en noe is ut marketentster bie de sjutteriej en ut is gaans ewweg van peerd en peerdrieje. In ut dageliks leëve woene Marc Gubbels en Silvie Senden in de Sjtallesjtraot in Oonder-Mhèèr mit hun dochter Anna. Ut hat uvveriges vertiejen jaor gedoord vurdat in Oonder-Mhèèr wer ins unne Preens vandan kump.

Veer weunsje Preens Marc en Preenses Silvie èè geweldig Preensejaor toe en hiel vööl sjpas en plezeer mit alle Vastenaovesaktevetèète.

Wie lang nog pus Karneval

Preens Marc I en Preenses Silvie I

JeugPreenses Lotte I

Optochrèèglemèènt

Eedere deelnummer an d'r Groete Optoch van de Sjravelerre va Mhèèr op Karnevalsmondig is verplich um zich in te sjrieve. Dat kint op Karnealszotterdig vanaaf aach oore saoves in Café Quaante  dur ut insjriefformeleer in de Sjravelerre dao in te lievere bie Vorst Jos en d'r Notaris. Es deer mit wilt doe an d'r optoch mot deer op de huugte zie van ut Optochrèèglemèènt. Es deer dat neet mie gaans oet d'r kop kint, klik dan op de foto van Preenses Trudy I hie-booëve en da kump ut optochrèèglemèènt nao veure.

De Sjravelerre

Preens Marc I & Preenses Silvie I
  Ieërevorst: Frans van Proemeren
Raod van Illuf:   Lede:
Vorst & Veurzitter: Jos Senden   Marleen Snoeck
Sekretaris: Fons Bastings   Trudy Weusten
Penningmèèster: Saskia van Dijk   Stan Goessens
Piet Beckers   Iere-lid:
Maurice Beckers   Peter van Hasselt
Tom Caelen    
Mark Gubbels    
Roy van Gerven    
Jack van Laar    
Patrick Quanten    
Jeroen Retrae    
Matthijs Spauwen    
Jos Stikkelbroek    
Mark Soudant    
Luc Vandewall    
René Willems     
Robby Wouters