Vanaaf miert zunt veer noe al in de ban van ut virus, dat zal uch zekker neet oontgange zie. Gelukkig hub veer waal nog Karneval kinne vere, mè daonao keem ut virus laangsem dizze kaant oet en loog os leëve bekaans sjtil. Zelfs de Broonk moes wieke vur dis versjrikkelikke krèènkde. En noe an d’r veuraovend van ut Vastenaovessezoen zalle och veer es Karnevalsvereniging knööp motte deurhakke uvver wat os de Karneval 2021 gèèt bringe.

Dizze zommer zunt veer al biejèèn gewes mit os Preensepaar Jim & Kim en och de owwersj van d’r JeugPreens en doe hub veer besjlooëte dat ut op dat memèènt nog vuls te vreug wor um get te besjlisse want gèn wis wie de epedemie zich zow goe voltrikke. Doe hub veer gezaag dat veer uterlik 1 oktober zowwe besjlete of veer waal of neet unne nuuje Preens zowwe oetrope in 2021. Veer hubbe dao uiteraard och d’r nuuje Preens dèè in 2021 zow regere, bie betrokke.

Op gonsdig 30 september is d’r Raod van Illuf dan och biejèèn gekomme um zich dao-euëver te buige. En unaniem hat d’r Raod doe besjlooëte um vur kommend sezoen gène Preens oet te rope. Veer hubbe ut sjtaandpeunt dat veer unne nuuje Preens èè volwaardig Karnevalssezoen mit alles d’rop en d’raan wille beeje en dat kin veer noe neet garandere. Mè och os regerende Preensepaar wil veer neet aaf lotte trèèje zoonder dat zie èè fie naosezoen kinne hubbe.

Os Preense were ummer driej weëke vur de Karneval oetgerope en die sjeze dan get wie in unne rollercoaster op die Vastenaovend aan um dan urreges op Esjelegonsdig tot sjtilsjtaand te komme. En alle Preense zigke dan achteraaf dat ze dan bliej zunt dat ze och nog èè naosezoen hubbe oe ze nog ins lekker d’rtengenaan kinne goe um zich veur te bereide op hun afsjeid Och dat wille veer os huidige Preensepaar neet aafneëme want èè deenk is oondertusje dudelik: Ut naosezoen in November kinse wat dat betref vergeëte. Prins Jim en Preenses Kim trèèje dit jaor dus neet aaf mè pas in 2022.

En dan de Vastenaovend zelf en d’r aanleup dao heen. Mit de maotrègele die noe gelde kinne veer natuurlik neet vööl organizere. De Vrolluujzitting is al gekènseld en och de Groete en Jeugd-zitting zalle neet deur kinne goe zoe wie veer dat gewend zunt. De Karneval zelf liek nog get wier weg en dao kin veer noe nog gaar nix uvver zigke. Um te kieke wat waal kin en maog, hub veer os èège Outbreek Mennesjmunt Tiem opgerich. Die gunt kieke wat meugelik is volgens de règelkes die veer dur Rutte (en Irma) kriege opgelaag én dur os gezoond versjtaand te gebruke en de gezoondhèèd van de luuj op de uursjte plaatsj te zitte. Dao is unne hoap kreativitèèt vur nuuëdig, dus luuj es deer goj ideeje hubt, lot ut os dan ezzebleef

Èè deenk is zekker: De Karneval 2021 zal neet oongemèrkt vurbie goe